ឡើងកូដគ្រប់ផ្នែក ខុសអ្វីតែទីផ្សារទូរសព្ទចល័ត LG បាត់ចំណូលរាប់រយលានឆ្នាំ ២០១៨

Entertainment Blog February 03, 2019

LG នៅតែបន្តទទួលបានជោគជ័យក្នុងវិស័យបច្ចេកវិទ្យា ដោយរបាយការណ៍ចំណូលឆ្នាំចាស់ ទទួលបាន ៥៤,៤ ពាន់លានដុល្លារ ខណៈប្រាក់ចំណេញសុទ្ធមាន ២,៤ ពាន់លានដុល្លារ កើនឡើង ១០ ភាគរយធៀបនឹងឆ្នាំ ២០១៧។ ប៉ុន្តែអ្វីដែលជាបញ្ហាប្រឈម គឺវិស័យឧស្សាហកម្មទូរសព្ទចល័ត ហាក់មានការធ្លាក់ចុះ គួរឲ្យកត់សម្គាល់។

ផ្នែកទូរសព្ទចល័តរបស់ LG ទទួលបានចំណូលប្រមាណ ៧,០៨ ពាន់លានដុល្លារ ប៉ុន្តែប្រតិបត្តិការចំណូល មានការខាតបង់ប្រមាណ ៧០០ លានដុល្លារ។ ក្នុងឆ្នាំ ២០១៩នេះ ទំនងជាមានការផ្លាស់ប្តូរ ដោយក្រុមហ៊ុនយក្សកូរ៉េខាងត្បូង នឹងពង្រឹងលើទីផ្សារស្មាតហ្វូនអាមេរិកខាងជើង និងកូរ៉េ ដើម្បីរក្សាលំនឹងការលក់ ជាមួយការជំរុញពីប្រព័ន្ធ 5G នាពេលដ៏ខ្លីខាងមុខនេះ។

សម្រាប់ឧស្សាហកម្មរបស់ LG Home Entertainment ដែលទទួលបានការពេញនិយមខ្លាំង ជាមួយទូរទស្សន៍ OLED TV និងប្រភេទអេក្រង់កម្រិត 4K ជួយឲ្យប្រាក់ចំណេញកើនដល់ ១,៣៥ ពាន់លានដុល្លារ ដូចទៅនឹង LG Home Appliance មានដូចជាទូទឹកកក និងម៉ាស៊ីនបោកសំលៀកបំពាក់ជាដើម ក៏កើនប្រាក់ចំណេញ ក្នុងតួលេខដូចគ្នា។

ជាមួយគ្នានេះសម្រាប់ឧស្សាហកម្មផ្នែកគ្រឿងម៉ាស៊ីនរថយន្ត LG Vehicle Components ក៏ជួយឲ្យក្រុមហ៊ុនទទួលបាន ១,២៤ ពាន់លានដុល្លារ ក្រោយចំណាយ ១,១ ពាន់លានអឺរ៉ូកាលពីឆ្នាំ ២០១៧ ក្នុងការទិញភាគហ៊ុន ៧០ ភាគរយពីក្រុមហ៊ុន ZKW ដែលជាចំណាយធំបំផុតប្រចាំប្រវត្តិសាស្រ្តរបស់ខ្លួន។